Mkurugenzi Arusha Dc Dkt Mahera awahamishia wafanyabiashara wa Mifugo kwenye mnada wa Kisasa

Mkurugenzi wa halmashauri ya Arusha Dc Dkt Charles Mahera amesema wamefanikiwa kuhamisha mnada wa Soko la mifugo ngaramtoni kwenda eneo la Lengijave katika kata ya Olkokola ambapo mnada huo una miundombinu ya kutosha kwa wafanyabiashara.

Akiwa katika eneo hilo na wananchi Dkt Mahera amesema kuwa mnada huo ulikuwepo tangu mwaka 1962 na mwaka 2007 miundombinu ikajengwa na vikao vilishakaa kukubaliana mnada huo utumike lakini baadhi ya watu waliokuwa na maslahi binafsi wakalazimisha mnada huo kuwa Ngaramtoni.

Amesema kuwa hayo yamefanyika kwasababu eneo la awali Ngaramtoni ni mamlaka ya mji mdogo hivyo eneo ni dogo ukilinganisha na idadi ya wafanyabiashara wanaofika mnadani ambapo lengo la halmashauri ni kwa ajili ya kuboresha hali ya wafanyabiashara ili kuongeza kipato.

Dkt Mahera Ameongeza kuwa eneo hilo liko nje kabisa ya mji hivyo linatoa pia fursa kwa halmashauri kuongeza mapato tofauti na ilivyokuwa mwanzo kwasababu idadi ya watu inaongezeka na soko hilo ni kila siku ya alhamisi na jumapili.

Kwa upande wa Diwani wa kata ya Olkokola Mh Kalanga Laizer amesema kuwa awali mnada huo ulinanza kutumika mwaka 1962 hivyo halmashauri ya Arusha Dc ikaanza kufufua upya kutokana na migogoro ambayo haina maana baina yao.

Akizungumzia fursa zitakazopatikana kwenye mnada huo ambao unaingiza zaidi ya watu elfu moja amesema kuwa kutakuwa na mamantilie wa kutosha,pamoja na halmashauri ujenga vibanda ili kukodisha kwa wafanyabiashara pamoja na ajira kwa watu mbalimbali ikiwemo usafi kwenye eneo hilo la mnada.

Nao wafanyabiashara katika mnada huo wameiomba halmashauri kuwajengea ukuta wa kuzunguuka kwasababu ya eneo hilo kuwa na baridi pamoja na upepo mkali jambo litakalowasaidia hata afya zao.