Bwawa la Mbitin lawa Kielelezo cha maendeleo Wilaya ya Ngorongoro

Mbunge wa jimbo la Ngorongoro Mh William Olenasha amesema mradi wa bwawa la Mbitin lililopo katika kata ya Enduleni ni msaada mkubwa kwa wafugaji na litakuwa limemaliza malalamiko yaliyokuwepo kabla ya Bwawa hilo kujengwa.

Olenasha amesema kuwa bwawa hilo lilijengwa na mamlaka ya hifadhi ya Ngorongoro kupitia agizo la Waziri mkuu wa Jamhuri ya Muungano wa Tanzania Mh Kasimu Majaliwa wakati alitembelea Wilayani humo na litatumika hata wakati wa kipindi cha ukame.

Amesema wananchi walikuwa wanatembea umbali wa zaidi ya kilomita 20 kwenda kutafuta maji kwa ajili ya matumizi ya mifugo lakini kwasasa huduma hiyo imeletwa karibu zaidi ili mifugo iendelee kufaidi.

“Unaweza ukakuta majani yapo lakini kama hakuna maji bado mifugo inapata tabu lakini kuwepo kwa bwawa hilo kutasaidia wafugaji wetu kutopata shida ambayo ilikuwepo kwa muda mrefu”Alisema Olenasha

Hata hivyo amewataka wananchi kutunza bwawa hilo ambalo ndiyo mbadala wa wafugaji na tayari litakuja kuwa kivutio kwa watalii kwasababu wanyama wameshaanza kuja ikiwemo kiboko na kuwataka wananchi wasiharibu miundombinu kwasababu bwawa hilo limejengwa kwa garama kubwa.

“Yani hapa umeona tayari kuna viboko hawana shida na wananchi na huko baadae watalii watakuja na itakua kivutio kikubwa”Alisema Olenasha

Kwa upande wa Mwenyekiti wa halmashauri ya Ngorongoro Bwana Mathew Siloma amesema kwasasa wanatafuta utaratibu mzuri wa matumizi ya bwawa hilo ili kulitunza kwasababu mifugo inayotakiwa kutumia bwawa hilo ni Mingi zaidi ya 10000 kwa siku.

Amesema kwa Kushirikiana na Mbunge William Olenasha pamoja na wananchi watatafuta namna ya mifugo kutumia maji ikiwa nje kuliko kuingia moja kwa moja kwenye bwawa kama ilivyo hivi sasa na kuendelea kutoa elimu kwa wafugaji juu ya matumizi ya bwawa hilo.

Ameongeza Bwawa hilo mpaka kukamili limetumia zaidi ya shilingi milioni 200 na litakuwa msaada na limepunguza changamoto ya wafugaji.

Mmoja wa mfugaji ambaye alikuwa ananywesha mifugo yake kwenye bwawa hilo amesema kuwa walikuwa wanapata adha kubwa sana ambapo mifugo ilikuwa mingine inakufa kutokana na ukosefu wa maji lakini matatizo yameisha.

Kuhusu kulitunza bwawa hilo kwa ajili ya matumizi sahihi ili lisiharibike amesema wataweka utaratibu wa wafugaji wa kuwajibishana wenyewe kwa wenyewe endapo atatokea mtu wa kuharibu miundombinu ambayo imejengwa kwa garama kubwa.