Mita ya maji yaibua kizaazaa 21st Century

Mkurugenzi na meneja uzalishaji wa kiwanda cha nguo cha 21st Century wanashikiliwa polisi baada ya Naibu Waziri wa Maji na Umwagiliaji, Jumaa Aweso kufanya ziara kiwandani hapo na kubaini mita ya maji hung'olewa usiku na kurejeshwa asubuhi.

Naibu waziri amefanya ziara kiwandani hapo jana Jumapili Machi 11,2018 akisema aligundua hilo baada ya kupata taarifa kutoka kwa raia wema.

Meneja uzalishaji, Clement Munisi amesema hakuwa na taarifa za kuchomolewa mita akimtaja mfanyakazi kiwandani hapo Samwel kuwa ndiye msimamizi wa kitengo cha huduma ya maji.

Naibu waziri, Aweso amemwagiza mwanasheria wa mamlaka ya maji Morogoro (Moruwasa), Tumaini Kimaro kufanya utaratibu wa kisheria ili viongozi wa kiwanda hicho wafikishwe mahakamani.