MANGURUWE APANDISHWA MAHAKAMANI AKIKABILIWA NA MASHTAKA 28 IKIWEMO UTAPELI

Mkurugenzi wa Kampuni ya Vanilla International Ltd, Simon Mkondya (40), maarufu Dk Manguruwe na Mkaguzi wa kampuni hiyo, Rweyemamu John (59) wamefikishwa katika Mahakama ya Hakimu Mkazi Kisutu, wakikabiliwa na mashitaka 28 yakiwemo ya kuendesha biashara ya upatu na utakatishaji fedha kinyume cha sheria.

Inadaiwa washtakiwa hao walijipatia Sh92.2 milioni kutoka kwa watu 19 tofauti, ambao walitoa kiasi tofauti cha fedha kwa kuwaahidi kuwa watapata faida mara mbili hadi tatu ya fedha walizotoa.

Washtakiwa hao wamefikishwa mahakamani hapo leo Jumanne, Novemba 5, 2024 na kusomewa kesi ya uhujumu uchumi namba 31523 ya mwaka 2024 na Wakili wa Serikali Mwandamizi, Job Mrema mbele ya Hakimu Mkazi Mkuu, Aaron Lyamuya.

Hata hivyo, kabla kusomewa mashitaka hayo, Hakimu Lyamuya aliwaambia washtakiwa hao hawaruhusiwi kujibu chochote kwa kuwa Mahakama hiyo haina uwezo wa kusikiliza kesi za uhujumu uchumi isipokuwa kwa kibali maalumu.

Pia, mashitaka yanayowakabili hayana dhamana kwa mujibu wa sheria, hivyo wataendelea kubaki rumande.

Kati ya mashitaka hayo 28,  19 ni ya kuendesha biashara ya upatu na tisa ni ya utakatishaji.

Katika moja ya mashitaka ya kuendesha biashara ya upatu, washtakiwa wanadaiwa  kati ya Januari Mosi, 2020 na Desemba Mosi,2023, jijini Dar es Salaam, walitenda makosa hayo.

Inadaiwa kuwa Mkondya akiwa kama Mkurugenzi wa kampuni hiyo na John akiwa Mkaguzi wake waliendesha biashara ya upatu kwa kuwaahidi watu watapata pesa mara mbili hadi tatu kama faida zaidi ya waliyotoa.

Inadaiwa washtakiwa hao walijipatia Sh92.2 milioni kutoka kwa watu 19 tofauti ambao walitoa kiasi tofauti cha fedha kwa kuwaahidi kuwa watapata faida mara mbili hadi tatu ya fedha walizotoa.

Katika mashitaka 19 ambayo ni ya utakatishaji yanayomkabili Mkondya peke yake, inadaiwa kuwa kati ya Januari Mosi, 2020 na Desemba Mosi, 2023 akiwa katika Mkoa wa Dar es salaam na akiwa kama Mkurugenzi wa Kampuni hiyo alijipatia jumla ya viwanja tisa katika kitalu namba AB eneo la Idunda mkoani Njombe.

Inadaiwa kuwa mshtakiwa huyo alijipatia  viwanja hivyo huku akijua ni mazalia ya makosa tangulizi ya kiendesha biashara ya upatu.

Baada ya kusomewa mashitaka hayo, upande wa mashitaka umedai kuwa upelelezi wa shauri hilo bado haujakamilika hivyo wanaomba tarehe nyingine kwa ajili ya kutajwa.

Hakimu aliahirisha kesi hiyo hadi Novemba 19, 2024 kwa ajili ya kutajwa.

Washtakiwa wote amerudishwa rumande kutokana na mashitaka yanayowakabili hayana dhamana kwa mujibu wa sheria.