Raila ataka wapinzani wa Chama chake kuunga mkono majadiliano na Uhuru

Nairobi, Kenya. Kiongozi wa ODM, Raila Odinga amewaomba wabunge kutoka chama chake kuunga mkono majadiliano yaliyofikiwa katika kikao cha Ijumaa kati yake na Rais Uhuru Kenyatta.

Odinga aliwataka wabunge hao wasiyumbishwe na watu waliojipanga kwa ajili ya uchaguzi mkuu wa mwaka 2022.

Aliwaambia wabunge wa chama hicho kwamba mkutano uliofanyika kwenye Ofisi za Rais zilizoko Jengo la Harambee Ijumaa iliyopita ni matokeo ya tukio la Januari 30 ambapo Raila aliapa kama rais wa watu.

Aliwahimiza kutumia kikamilifu fursa ya mpango uliofikiwa ili kuhakikisha mazungumzo ya kitaifa yanaanza.

"Mnapaswa kuunga mkono mazungumzo ya kitaifa kwa sababu ni zao la kuapa kwetu," alisema Raila wakati wa mkutano uliofanyika katika Jengo la Orange Jumanne.