Mabaraza ya madiwani hayana mamlaka kumfutakazi mtaalam wa ardhi

Serikali imetangaza kuondoa mamlaka ya baraza ka madiwani kupendekeza kufutwa kazi kwa wataalamu wa ardhi kuanzia Julai Mosi

Msimamo huo umetolewa na Waziri wa Ardhi, Nyumba na Maendeleo ya Makazi, William Lukuvi leo, Julai 13 alipokutana na kampuni binafsi za upangaji na upimaji miji, watendaji wa mitaa na vijiji

Waziri ametoa msimamo huo akisema mkakati huo unakusudia kuwapa maofisa ardhi wa halmashauri uhuru wa kutekeleza majukumu yao bila kuingiliwa na madiwani

"Diwani akikuambia upime eneo la wazi kataa. Hawezi kukufukuza. Ukiteleza ukakosea kuutumia uhuru wako, utafukuzwa kazi wewe mwenyewe," amesema Lukuvi

Akieleza umuhimu wa uamuzi huo, waziri amesema utaondoa ujenzi na uvamizi unaofanywa maeneo ya wazi kwa shinikizo kutoka kwa madiwani hivyo kuongeza makazi holela maeneo mengi ya mjini.

 Kurahisisha upimaji, urasmishaji wa makazi holela ambako wananchi wengi wa kipato cha chini wanaishi, amesema Serikali imefungua ofisi katika kanda nane ambako masuala yote ya ardhi yatashughulikiwa

"Kuanzia sasa, mtakuja wizarani kutusalimia tu. Mambo yote mtayamaliza kwenye ofisi za kanda ambako maofisa wote watakuwapo," amesema

Amezitaja ofisi hizo za kanda kuwa ni Dar es Salaam, Dodoma, Moshi, Simiyu, Mwanza, Mtwara, Tabora na Mbeya